كهف الجاره ⛺
تخيل تبقي ماشي في وسط الصحرا فتلاقي قدامك حفره في الارض فتدخل فيها فتلاقي نفسك فجأة اتنقلت لمكان تاني اشبه بالاماكن الخيالية اللي في افلام الاساطير و كأنك دخلت لفجوة زمنية نقلتك لمكان و زمان تاني 🙄
ده اللي حيحصلك فعلا لو دخلت #كهف_الجاره في الصحراء الغربية 🤔
كهف_الجارة احدي عجائب #مصر اللي كتير ميعرفوش عنها حاجة ، مكان اسطوري بمعني الكلمة ، من اغرب الاماكن اللي ممكن تشوفها في حياتك بسبب تكوين الكهف العجيب و شكله الغريب من جوة
لو دخلت الكهف ده حتلاقي تكوينات جيولوجية حتبهرك اشبه بشلالات مياه متحجرة نازلة من اعلي الكهف في ابداع رباني مش حتتخيل انه موجود الا في قصص الاساطير 🐲
العجيب بقي ان الرواسب اللي نازلة من فوق دي اصلا حصلت بسبب تسريب المياه من خلال رمال الصحراء علي مدار ملايين السنين و بسبب الحرارة الشديدة اتجمدت بالشكل ده عشان تعمل المكان الخيالي ده
الكهف ده اكتشفه رحالة الماني و كان معاه الدليل بتاعه و بعد عاصفة شديدة لقوا المكان ده قدامهم فدخلوه يحتموا فيه فلقوا واحد من اندر كهوف العالم حتي ان الالمان قالو عليه انه اجمل مكان عينك ممكن تقع عليه في قارة افريقيا
الكهف مكون من عدة مغارات و علي بعد ٥٠ متر تحت باطن الارض و هو بين الواحات البحرية و مدينة #اسيوط اللي بيبعد عنها حوالي ١٤٠ كيلو
من الحاجات اللي اكتشفوها جوة الكهف هي بعض المنحوتات البدائية اللي بيرجع تاريخها لعصر الانسان البدائي و ده بيوحي ان الكهف ده كان ملجأ للانسان من الاف السنين ، كفاية بس انك تعرف ان عمر الكهف ده يعدي ال ٤٠ مليون سنة ..
سبحان المبدع
