دي الجملة اللي فاجأني بيها أولادى و إحنا قاعدين نتفرج علي ألبوم الصور بتاعي زمان…
أنا استوقفني تعبيرهم جداً لما قالولي الجملة دي ، و بقيت أبص على الصور و أقول يااااااااه الصور دي من 34 سنة…
كنا بيئة هنا يا تري ؟!
كنا بيئة ليه ؟؟ ده إحنا كنا بنطلع المصيف أسرة كاملة خالاتي و خالاني و ولادهم ، شقة واحدة كانت تلمنا و مش مهم هاننام فين ولا إزاي علي رأي أمي : (حصيرة الصيف واسعة)
كنت أصحي الصبح أجري ع المطبخ ألاقي ماما و خالاتي بيجهزوا الفطار و ساندوتشات البلاج ، و بابا وخالو نزلوا يشتروا السمك اللي هاناكله ع الغدا ، و الشباب و البنات بيلموا المايوهات من علي الحبل علشان نلبس و نجهز للبلاج…
كنا مع بعض…
و بنعمل كل حاجة مع بعض ، نجهز الكاسيت و الشرايط اللي هاناخدها معانا ع البحر ، و نأمن علي الحجارة بتاعة الكاسيت كان اسمها ( حجارة طُرش) و نجهز النضارة و الراكيت و لعب البحر ( الشوكة و الجردل و المعلقة و الجاروف) و بعد ما كل فرد ينجز مهمته نتحشر جوه العربيات و اللي يفضل مننا يقعد فى شنطة العربية و يدلدل رجليه لحد ما نوصل البلاچ…
كنا كلنا شبه بعض ، لا شكلنا غريب ولا عرايا على البحر ،كنا مصريين عاديين رايحين يصيفوا و يفرحوا و يضحكوا…
و كانت البلاچات بتفضل نضيفه و نفرش و نقعد و نلعب و ناكل و نلعب راكت و نعيش حياتنا..
كنا بنعرف نعيش..
ولادنا بقوا شايفين ذكرياتنا دي (بيئة) و اتصدرلهم فكرة المصايف السبع نجوم و القري السياحية اللي ماحصلتش مع إنهم لو اتفرجوا على أي فيلم اجنبي هايلاقوهم على الشط بيفرشوا و يقعدوا عادي جداً و معاهم سلة فيها أكلهم و شربهم و الكريمات الخاصة بيهم و عايشين حياتهم عادي جداً…
إحنا اتباعلنا التروماي حرفياً..
اتباعلنا فكرة الإستهلاك و إن هو ده الرقي و الشياكة و التقدم..
التقدم عمره ماكان ب واخد ع البلاج حلة محشي ولا واخد ساندوتش كوردن بلو !! ..
التقدم ب سلوكك و تصرفك و القيمة اللي أنت بتتعامل بيها و مؤمن بيها في الحياة ..
ماكناش بيئة يا ولادي
كنا ناس بتعرف تعيش
ناس عندها قيمة الأسرة عالية و غالية
ناس مؤمنة إن الحب بيصنع المعجزات
كنا ناس بسيطة و غير مستهلكة
كنا بنحب بعض و نحب نفرح مع بعض و لبعض
كان عندنا قيمة التعاون و كانوا الأقارب سند و عزوة مش عقارب..
كنا محترمين و محتشمين و بنحترم عادتنا و ديننا و قيمنا المجتمعية..
عمرنا ما كنا بيئة ، كنا راقيين و علشان كده دمروا قيمنا و سموها بأسماء أخري ، و لو عايزين تنقذوا ما يمكن انقاذه دوروا على القيمة و رجعوها من جديد..
ارجعوا لأصلكم علشان التوهة لو زادت مافيش منها رجوع..
ياااه يا بابا انتم كنتم بيئة جدا
